Guidetrip.info
Lifestyle / Travel

ពិបាកសម្រេចចិត្ត មិនដឹងគួរទៅកោះរ៉ុង ឬ កោះរ៉ុងសន្លឹម?

March 17, 2019
ពិបាកសម្រេចចិត្ត មិនដឹងគួរទៅកោះរ៉ុង ឬ កោះរ៉ុងសន្លឹម?

កោះរ៉ុង និង​កោះរ៉ុងសន្លឹម​ ជាកោះបែបធម្មជាតិ​ ហើយមានចម្ងាយមិនឆ្ងាយពីគ្នាប៉ុន្មានទេ និងមានភាពទាក់ទាញយ៉ាងខ្លាំង។ មនុស្សភាគច្រើនយល់ច្រឡំថាកោះទាំងពីរនេះជាកោះតែមួយ តែតាមពិតមិនមែនទេ គ្រាន់តែកោះទាំងពីរនេះមានឈ្មោះស្រដៀងគ្នាបន្តិច ហើយមានទេសភាពប្រហាក់ប្រហែលគ្នា មានរីស៊តទំនើបៗជាច្រើនដូចគ្នា និងមានភាពស្រស់ស្អាតដូចគ្នាថែមទៀតផង។

បើនិយាយពីជុំវិញកោះរ៉ុង និងកោះរ៉ុងសន្លឹមនៅមានកោះតូចៗជាច្រើនទៀត ព្រមទាំងមានឆ្នេរសមុទ្រជាច្រើនដែលនៅជាប់កោះទាំងពីរនេះ។ ភាគច្រើនមនុស្សដែលចូលចិត្តភាពរ៉ូមែនទិក មិនសូវអ៊ូអរតែងតែអញ្ជើញទៅកោះរ៉ុងសន្លឹម ដោយសារនៅទីនោះមានភាពស្ងាប់ស្ងាត់ជាងកោះរ៉ុង។

ដោយសារតែ​ភាពទាក់ទាញដូចគ្នា ទើបធ្វើអោយភ្ញៀវទេសចរពិបាកក្នុងការសម្រេចចិត្តក្នុងដំណើរកំសាន្តរបស់ពួកគេ ថាតើពួកគេគួរទៅលេងកោះមួយណារវាងកោះរ៉ុង និង​កោះរ៉ុងសន្លឹម។ ព្រោះភ្ញៀវទេសចរអាចនឹងមានពេលវេលាខ្លី​ ក្នុងដំណើរកំសាន្តរបស់ពួកគេ ឬប្រាក់មានចំនួនកំណត់ ដូច្នេះហើយចង់ទៅកោះមួយក្នុងចំណោមកោះទាំងពីរនេះ។ សម្រាប់មនុស្សមួយចំនួន អ្នកខ្លះចូលចិត្តទៅកោះរ៉ុង រីឯអ្នកខ្លះទៀតចូលចិត្តទៅកោះរ៉ុងសន្លឹម។ 

តោះវែកញែកថាតើពួកយើង គួរទៅលេងកោះមួយណា។

បើយើងនិយាយអំពីទេសភាពនៃកោះទាំងពីរនេះ គឺកោះទាំងពីរនេះមានអាកាសធាតុ និងទេសភាពស្រដៀងគ្នា ឯទំហំវិញគឺ​ កោះរ៉ុងមានទំហំធំជាងកោះរ៉ុងសន្លឹម។ 

សម្រាប់បរិយាកាសវិញ កោះរ៉ុងសន្លឹមហាក់បីដូចជាស្ងាប់ស្ងាត់ជាងកោះរ៉ុងបន្តិច។ ចំណែកឯតម្លៃស្នាក់នៅ និងថ្លៃហូបចុកវិញលើកោះទាំងពីរនេះ មានតម្លៃប្រហាក់ប្រហែលគ្នា។

គួរបញ្ជាក់ផងដែរថា កោះទាំងពីរនេះមានចម្ងាយមិនឆ្ងាយពីនេះប៉ុន្មានទេដូចច្នេះវាមិនចំណាយពេលវេលាច្រើនទេក្នុងការធ្វើដំណើរ។ បើចង់ឆ្លងពីកោះមួយទៅកោះមួយភ្ញៀវទេសចរអាចធ្វើដំណើរតាមទូកទេសចរណ៍តូចៗក៏បានដែរ ដើម្បីអោយបានស្គាល់កោះទាំងពីរនេះ ព្រោះកុំឲ្យខាតជើងជ្រុលនឹងមកដល់ទៅហើយ​។​ ម៉្យាងវិញទៀត ជាពិសេសពេលធ្វើដំណើរ​ ភ្ញៀវទេសចរក៏អាចគយគន់ទេសភាពយ៉ាងស្រស់ត្រកាល ឬ ស្ទូចត្រី និងអាចមុជទឹកលេងមើលផ្កាថ្មក្រោមបាតសមុទ្របានទៀតផង។

សរុបមក បើសិនជាភ្ញៀវទេសចរមិនទាន់ស្គាល់កោះទំាងពីរនេះ​ ហើយចង់ទៅកម្សាន្តកោះណាមួយនៃកោះទាំងពីរនេះ, ភ្ញៀវទេសចរគួរតែទៅកោះទាំងពីរនេះក្នុងពេលតែមួយ ពីព្រោះកុំអោយខាតពេលវេលាច្រើនក្នុងការធ្វើដំណើរមកម្តងទៀត។