Guidetrip.info
Lifestyle / Travel

១០ចំណុចដែលជាគន្លឹះសម្រាប់អ្នកដែលចូលចិត្តដើរកំសាន្ត

March 21, 2019
១០ចំណុចដែលជាគន្លឹះសម្រាប់អ្នកដែលចូលចិត្តដើរកំសាន្ត

នៅពេលដើរលេងម្ដងៗតែងតែជួបនូវរឿងដែលស្មានមិនដល់ជាច្រើន ឬក៏ រឿងប្លែកៗដូចជា៖ បាត់កាបូបលុយ, ខ្វះពេលវេលា, ខ្វះសម្ភារៈប្រើប្រាស់ ឬក៏ ស្ដាយក្រោយព្រោះមិនបានធ្វើអ្វីមួយនៅពេលដើរលេងនោះ។ ដូច្នេះក្រុមការងាររបស់យើងខ្ញុំសូមលើកយកនូវ ១០ចំណុច ដែលជាគន្លឹះសម្រាប់អ្នកដែលចូលចិត្តដើរលេងកម្សាន្តមិនថាក្នុង ឬ ក្រៅប្រទេសឡើយ។

១០ ចំណុចនោះមានដូចខាងក្រោម៖

១. ថតរូបអនុស្សាវរីយ៍ឲ្យបានច្រើន

នៅពេលដែលអ្នកទៅកន្លែងណាមួយអ្នកនឹងជួបនូវទិដ្ឋភាពផ្សេងៗគ្នា ឬ មនុស្សថ្មីៗជាច្រើន ហើយរឿងទាំងអស់នោះយើងមិនអាចកំណត់បានឡើយ ដូច្នេះអ្នកអាចចងចាំពេលវេលាដ៏មានតម្លៃទាំងនោះជារៀងរហូតបានដោយការថតរូបទុកជាអនុស្សាវរីយ៍ ប៉ុន្តែត្រូវចងចាំថាកុំភ្លេចខ្លួនអោយសោះកុំអោយសល់ពេលវេលាតិចក្នុងការរីករាយជាមួយនឹង ទេសភាពក៏ដូចពេលវេលាដ៏ល្អទាំងនោះ។

ឧទាហរណ៍៖ ដំណើរកំសាន្តទៅកាន់សួនសត្វនោះអ្នកនឹងមានរឿងជាច្រើនដែលត្រូវធ្វើដូចជា៖ ថតរូបសត្វ ឬ ថតរូបជាមួយសត្វជាអនុស្សាវរីយ៍, ការអោយចំណីសត្វ, ការស្វែងយល់ពីប្រភេទសត្វជាដើម។

២. យកកន្សែង ឬ អាវក្រៅទៅជាមួយ

អ្នក គួរ តែ យក វាដាក់ តាម ខ្លួន ជាប់ ជា និច្ច ព្រោះយើង មិន ដឹង ថា យើង នឹង ត្រូវ ការ វា ពេល ណា នោះ ទេ តែ នៅ ពេល អ្នកត្រូវការវា អ្នក នឹង អរគុណ ខ្លួន ឯង ដែល បាន ដាក់ វា មកជាមួយ។ ភាគច្រើន អ្នក នឹង ត្រូវ យក វា មក ប្រើ គឺនៅពេល ដែល ត្រូវ កម្ដៅ ថ្ងៃ ខ្លាំង, ដាក់វត្ថុ ប្រើ ប្រាស់ផ្សេងៗ, ពេលអ្នកមានអារម្មណ៏ថារងា ឬក៏ បាំង មុខ ជា ដើម ។

ឧទាហរណ៍៖ ដំណើរកំសាន្តរបស់អ្នកចំពេលរដូវក្តៅនោះអ្នកនឹងត្រូវការកន្សែង ឬ អាវក្រៅ ដើម្បីបាំងថ្ងៃជាមិនខានឡើយ។

៣. កុំ ភ្លេច យក កាស ទៅតាមខ្លួន

ពេលខ្លះអ្នកអាច នឹង ជួប សម្លេង រំខាននៅ ពេលធ្វើដំណើរ ឬ នៅ តាម ទី សាធារណៈ ផ្សេង ៗជាដើម ដូច្នេះហើយអ្នក គួរ តែ យក កាស ទៅ ជាមួយដើម្បី ស្តាប់ចំរៀង ឬ ស្តាប់ភ្លេងកំសាន្តអារម្មណ៏ ដែលធ្វើអោយចៀសវាងនូវ សម្លេង រំខាន ទាំង អស់ នោះ និងកុំអោយវាបង្ក ឲ្យ អ្នក មាន អារម្មណ៍ ថាធុញ ថប់ នៅពេល ដើរ លេង កម្សាន្ត។

ឧទាហរណ៍៖ អ្នកធ្វើដំណើរតាមរថយន្តក្រុង នោះប្រាកដជាមានភ្ញៀវអ្នកដំណើរជាច្រើនដូច្នេះអាចនឹងមានសំលេងរំខានដោយការនិយាយគ្នា ឬ សំលេងរថយន្តជាដើម។

៤. ភ្លក្ស ឬ បរិភោគអាហារប្រចាំតំបន់

អាហារប្រចាំតំបន់ខ្លះ អាចនឹងខុសប្លែកពីតំបន់របស់អ្នក ហើយពេលខ្លះទៀតក៏គួរឲ្យខ្លាច និងមិនហ៊ានបរិភោគឡើយ តែបើសិនជាអ្នកមិនហ៊ានបរិភោគវាទេ អ្នកនឹងមិនបានទទួលនូវបទពិសោធន៏ទាំងអស់នោះឡើយ ប៉ុន្តែដើម្បីអោយទទួលបាននូវបទពិសោធន៍ និងអនុស្សាវរីយ៍ ពិតប្រាកដទាំងអស់នោះ អ្នកមិនគួរស្ទាក់ស្ទើរក្នុងការភ្លក្សវាឡើយ។

៥. ធ្វើដំណើរថ្មើរជើង ឬ ជួលកង់ជិះ

ការធ្វើដំណើរបែបនេះចំណាយពេលបន្តិចមែន តែដើម្បីអោយបានស្គាល់ហើយយល់ដឹង ពី តំបន់នោះ ឬក៏ ទស្សនាអ្វីដែលប្លែកៗអោយបានពិតប្រាកដនោះ អ្នកគួរតែសាកប្រើវិធីមួយនេះ។ យ៉ាងណាមិញ កុំភ្លេចដាក់ទូរសព្ទ័ ឬ យកអាស័យដ្ឋានកន្លែងស្នាក់នៅ ទៅតាមខ្លួនផងដើម្បីងាយស្រួលនៅពេលដែលអ្នកវង្វេងផ្លូះ។

ឧទាហរណ៍៖ បើសិនជាអ្នកវង្វេងផ្លូវហើយមានអាស័យដ្ឋានសណ្ឋាគារនោះអ្នកអាចធ្វើការសាកសួរមនុស្សនៅតំបន់នោះអំពីអាស័យដ្ឋានសណ្ឋាគារ ឬក៏ អាចភ្ជាប់ទំនាក់ទំនងទូរសព្ទ័ទៅកាន់សណ្ឋាគារផ្ទាល់ក៏បាន។

៦. ដាក់លុយអោយបានច្រើនកន្លែង

ពេលខ្លះអ្នកនឹងអាចបាត់កាបូលុយ ឬ កាតធនាគារខូច ឬ កន្លែងនោះមិនមានកន្លែងដកលុយ ដូច្នេះគំនិតល្អអ្នកគួរទុកលុយនៅកន្លែងផ្សេងៗគ្នាឲ្យបានច្រើន។

ឧទាហរណ៍ដូចជា៖ ស្រោមជើង, ស្រោមដៃ, ហោប៉ៅអាវ, ហោប៉ៅខោ ឬ កាបូបរបស់អ្នកជា ដើម។

៧. បើកចិត្តឲ្យទូលាយ

ជាការពិតណាស់នៅពេលដែលយើងទៅក្រៅប្រទេស ឬក៏ តំបន់ណាមួយដែលមានប្រពៃណី ខុសគ្នាពីអ្នក វានឹងធ្វើអោយអ្នកមានអារម្មណ៏ថាឆ្គង ហើយពេលខ្លះទៀតអ្នកមិនអាចទទួលយកបានទៀតផង តែបើតាមពិតទៅ នោះជាពេលវេលាដែលអ្នកត្រូវរៀនបើកចិត្តឲ្យ ទូលាយ ឬក៏ សិក្សាយល់ដឹងពីប្រពៃណីផ្សេងៗ។ អ្នកមិនចាំបាច់យល់ស្របថាអ្វីដែលគេ ប្រព្រឹត្ត គឺជារឿងត្រឹមត្រូវ ឬក៏ មានប្រយោជន៏នោះទេ ព្រោះវាជាការសិក្សាស្វែងយល់ពីប្រពៃណីរបស់ពួកគេ ហើយផ្ទុយទៅវិញអ្នកនឹងអារម្មណ៏ភ្ញាក់ផ្អើលនូវអ្វីដែលអ្នកបានសិក្សាពីគេ។

៨. ញញឹម និង និយាយពាក្យសួស្ដី

ការរាប់អានមិត្តតែងតែប្រសើរជាងរាប់អានសត្រូវ ដូច្នេះនៅពេលដែលអ្នកបានទៅតំបន់ដែល ថ្មី អ្នកគួរមានស្នាមញញឹមជាប់ជានិច្ច ហើយអាចរៀននិយាយពាក្យសួស្ដី ដោយប្រើភាសា របស់គេ ដែលជាការគួរសម ឬ ជាឪកាសបានទំនាក់ទំនងជាមួយនឹងមនុស្សនៅតំបន់នោះ ដើម្បីជាការរាប់អានមិត្តភាព។

៩. គេងឲ្យបានគ្រប់គ្រាន់

ភាគច្រើនអ្នកដែលទៅដើរលេងពួកគេមិនសូវគិតគូរឿងគេងទេ តែបើតាមការពិតនៅពេលដែលអ្នកមិនបានគេងគ្រប់គ្រាន់នោះ អ្នកប្រាកដជាមិនមានអារម្មណ៏ស្រល់ស្រាយពេញលេញនោះទេ។ តែយ៉ាងណាមិញ បើសិនជាយើងគេងច្រើនពេក វាក៏ជាហេតុធ្វើឲ្យខាតបង់ពេលវេលាដ៏ល្អទាំងអស់នោះផងដែរ ។

ឧទាហរណ៍៖ ចូលគេងម៉ោង ១១យប់ ក្រោក ឡើងម៉ោង ៦:៣០ព្រឹក ហើយធ្វើលំហាត់ប្រាណពេលព្រឹក នោះអ្នកនឹងទទួលបាននូវអារម្មណ៏ស្រល់ស្រាយ ហើយមានពេលវេលាច្រើនសម្រាប់ដើរកំសាន្តថែមទៀតផង។

១០. រៀបចំពេលវេលាឲ្យបានត្រឹមត្រូវមុនធ្វើដំណើរកំសាន្ត

ជាធម្មតាពេលវេលាដើរលេងសម្រាប់ដំណើរកំសាន្តណាមួយតែងតែមានការកំណត់ដូចជា៖ ១ថ្ងៃ, ២ថ្ងៃ, ១សប្តាហ៍ ឬក៏ ២សប្តាហ៍ ជាដើម ដូច្នេះហើយបើសិនជាយើងមិនបានរៀបចំវាឲ្យបានល្អនោះទេ អ្នកនឹងស្តាយថាមិនបានទៅកន្លែងមួយនេះ, កន្លែងមួយនោះ ឬក៏ មិនបានកំសាន្តឲ្យអស់ពីចិត្តនោះទេ។ យ៉ាងណាមិញ បើសិនជាអ្នកចង់រៀបចំដំណើរកំសាន្តរបស់អ្នកឲ្យបានល្អប្រសើរ ពោលអ្នកត្រូវយល់ដឹងពីតំបន់នោះខ្លះៗជាមុនសិន ថាតើអ្នកនឹងទៅកំសាន្តនៅកន្លែងណាខ្លះ ឬ ទៅកំសាន្តកន្លែងណាមុននៃតំបន់នោះ ហើយត្រូវរៀបចំ សម្ភារៈ ប្រើប្រាស់ដែលត្រូវប្រើនៅពេលទៅដល់ទីនោះ ជៀសវាងខ្វះខត សម្ភារៈ ប្រើប្រាស់ ដែលជាហេតុនោះឲ្យអ្នកខាតពេលវេលាក្នុងការទិញជាដើម។

ឧទាហរណ៍៖ ទៅកំសាន្តនៅតំបន់សមុទ្រហើយអ្នកចង់ហែលទឹកលេង ដូច្នេះបើអ្នកមិនបានរៀបចំសំលៀកបំពាក់សម្រាប់ហែលទឹក ឬ អាវពងហែលទឹក ឬ ឧបករណ៏លេងទឹក នោះអ្នកនឹងចំណាយពេលវេលាដើម្បីទៅជួល ឬ ទិញពីកន្លែងណាមួយមិនខានឡើយ។