Guidetrip.info
Lifestyle / Travel

របៀបចំណាយប្រាក់តិចក្នុងដំណើរកម្សាន្ត ប៉ុន្តែសប្បាយចិត្ត

March 23, 2019
របៀបចំណាយប្រាក់តិចក្នុងដំណើរកម្សាន្ត ប៉ុន្តែសប្បាយចិត្ត

របៀបចំណាយប្រាក់តិចក្នុងដំណើរកម្សាន្ត ប៉ុន្តែសប្បាយចិត្ត គឺជាវិធីដ៏ល្អសម្រាប់យើងទាំងអស់គ្នា។ ហើយការ​ធ្វើ​ដំណើរ​កម្សាន្ត​ ​​​គឺជា​ផ្នែក​មួយ​ដ៏​សំខាន់​នៃ​ដំណើរ​ជីវិត​ ​មិន​ថា​ការ​ធ្វើ​ដំណើរ​ជិត​ ឬ​ឆ្ងាយ​ ជាមួយក្រុម​គ្រួសារ​ មិត្តភ័ក្ដិ គូរស្នេហ៏ ឬ ​ម្នាក់​ឯង​នោះ​ទេ វា​សុទ្ធ​តែ​ជា​បទពិសោធន៍​ដ៏​ល្អ​សម្រាប់​ជីវិត​របស់អ្នក។​

បើសិនជាអ្នកមិនមានភាពវៃឆ្លាតក្នុងការធ្វើដំណើរកម្សាន្តនោះទេ នោះអ្នកនឹងជួបនូវបញ្ហាការចំណាយប្រាក់ច្រើន និងមិនមានអារម្មណ៏ថាសប្បាយរីករាយនោះទេ ដូច្នេះហើយយើង​ត្រូវ​តែមាន​ភាព​ឆ្លាតវៃ​ក្នុង​ការ​ធ្វើ​ដំណើរ​ទៅ​ណា​មក​ណា។ ​ឧទាហរណ៍ដូចជាមុនពេលធ្វើ​ដំណើរ ​អ្នកគួរតែស្វែង​​យល់​ពីផ្លូវទៅកាន់តំបន់នោះជាមុនសិន ថាតើត្រូវប្រើមធ្យោបាយធ្វើដំណើរអ្វីខ្លះទើបអ្នកអាចទៅដល់ទីនោះ ធ្វើបែបនេះប្រាកដណាស់អ្នកនឹងបានយល់ដឹងពីដំណើរកម្សាន្តរបស់អ្នកកាន់តែច្បាស់ និង​វិធី​​កាត់​បន្ថយ​ការ​ចំណាយ​ខ្លះៗពី​ដំណើរ​កម្សាន្ត​នោះ។​

ជាការពិតណាស់ រាល់ដំណើរកម្សាន្ដមួយណាពិតជាត្រូវការចំណាយប្រាក់ ក៏ប៉ុន្ដែវាមិនមែនជាបញ្ហាចម្បងនោះទេ ក្រុមការងារយើងខ្ញុំសូមណែនាំអ្នកនូវចំណុចមួយចំនួនដើម្បីអោយដំណើរកម្សាន្តរបស់អ្នកប្រព្រឹត្តិទៅដោយសប្បាយរីករាយ និងមិនសូវចំណាយប្រាក់ច្រើន។

១. រៀបចំពេលវេលានៃដំណើរកម្សាន្ត និងបើកចិត្តអោយទូលាយក្នុងការទទួលយកអ្វីដែលថ្មី

ដំណើរកម្សាន្ដនីមួយៗអ្នកនឹងជួបមនុស្សថ្មី សាកល្បងអាហារថ្មី ឬក៏ បទពិសោធន៏ថ្មីៗជាច្រើន។ ដូច្នេះអ្នកគួរតែចំណាយពេលអោយបានច្រើនទៅលើ ការដើរតាមផ្លូវ, ការដើរផ្សារ, ជជែកជាមួយអ្នករស់នៅតំបន់នោះ, ដើរលេងតំបន់ភ្នំ, មើលថ្ងៃលិច, ដើរលេងនៅតាមឆ្នេរសមុទ្រ ឬ ហែលទឹកលេងជាដើម។ ធ្វើបែបនេះដំណើរកម្សាន្ដរបស់អ្នកនឹងមានភាពសប្បាយរីករាយ មានអនុស្សាវរីយ៍ច្រើន ហើយអ្នកនឹងទទួលបានអ្វីដែលថ្មីជាច្រើនពីតំបន់ទាំងនោះ។

២. រក្សាតម្រូវការរបស់អ្នកអោយនៅទាប

ដំណើរកម្សាន្ដដ៏ល្អគួរមានការទិញទំនិញថ្មីៗ ត្រូវការសេវាកម្មគ្រប់ពេល ត្រូវការខ្យល់អាកាសបរិសុទ្ធ ត្រូវការអាហារល្អៗ ត្រូវការសុវត្ថិភាព និងកន្លែងស្នាក់នៅដ៏សមរម្យជាដើម។ តែអ្វីទាំងនេះហើយ ដែលធ្វើអោយអ្នកចំណាយប្រាក់ច្រើនពីដំណើរកម្សាន្តរបស់អ្នក។

ឧទាហរណ៍៖​ បើសិនអ្នកចង់បានខ្យល់អាកាសបរិសុទ្ធ ឬ ចង់ហាត់ប្រាណ អ្នកអាចចេញទៅខាងក្រៅស្រូបយកខ្យល់អាកាសធម្មជាតិ និងដើរកម្សាន្តនៅតាមផ្សារ, ផ្សារទំនើប ឬ ដើរកម្សាន្តនៅតាមឆ្នេរសមុទ្យជាដើម។ ហើយការធ្វើបែបនេះអ្នកនឹងអាចកាត់បន្ថយការចំណាយបានខ្លះ និងបានស្គាល់ពីតំបន់នោះយ៉ាងច្បាស់ថែមទៀតផង។

៣. ការទិញសំបុត្រ ឬ ការកក់កន្លែងស្នាក់នៅ

ប្រសិនបើអ្នកចំាដល់​ថ្ងៃ​ធ្វើ​ដំណើរ និងជិតដល់ថ្ងៃធ្វើដំណើរ ​ទើប​ទិញ​សំ​បុត្រ ឬ​​ កក់​បន្ទប់​សម្រាប់​ស្នាក់​នៅ​ នោះតម្លៃ​ទាំងអស់នោះនឹងថ្លៃ ពីព្រោះនៅពេល​ថ្ងៃឈប់​សម្រាក ​ឬ​ថ្ងៃបុណ្យ​ទាន​អី​ហ្នឹង គឺ​វា​នឹង​ឡើង​ថ្លៃ ​អាច ១ ​គុណ​នឹង​ ២ ឬ​ ៣​ ហើយពេលខ្លះទៀតវានឹងធ្វើអោយដំណើរកម្សាន្តរបស់អ្នកមិនបានប្រព្រឹត្តទៅថែមទៀតផង​ ដោយសារមិនមានសំបុត្រ ឬ មិនមានកន្លែងស្នាក់នៅជាដើម។ ប៉ុន្តែបើសិនជាអ្នកធ្វើការ​ទិញ​សំ​បុត្រ ឬ​​ កក់​បន្ទប់​សម្រាប់​ស្នាក់​នៅ រួចរាល់ហើយអោយបានមុន១ខែ ២ខែ នោះអ្នកប្រហែលជាមិនមានការចំណាយច្រើនទៅលើវានោះទេ ផ្ទុយទៅវិញអ្នកមិនចាំបាច់ព្រួយបារម្ភក្លាយមិនមានសំបុត្រ ឬ​ កន្លែងស្នាក់នៅ ថែមទៀតផង។

ឧទាហរណ៍៖​ បើសិនជាដំណើរកម្សាន្តរបស់អ្នកនៅថ្ងៃឆ្លងឆ្នាំ នៅលើភ្នំបូកគោ អ្នកអាចធ្វើការកក់បន្ទប់សណ្ឋាគារ អោយបានមុន១ខែ ២ខែ ឬ ៣ខែ នោះតម្លៃនៃបន្ទប់សណ្ឋាគារនឹងមានតម្លៃទាប។

៤. បន្ថយល្បឿនបន្ដិចក្នុងការធ្វើដំណើរ

វានឹងធ្វើអោយដំណើរកម្សាន្ដរបស់អ្នកកាន់តែល្អថែមទៀតផង ពីព្រោះអ្នកនឹងបានដើរលេងច្រើនកន្លែង បានមើលទេសភាពតាមផ្លូវ ឬក៏ បានថតរូបជាច្រើន។ ហើយប្រសិនបើអ្នកមិនជ្រើសយកការធ្វើដំណើរតាមយន្តហោះនោះ អ្នកអាចធ្វើដំណើរពីកន្លែងមួយទៅកន្លែងមួយទៀត ដោយប្រើមធ្យោបាយងាយៗ និងធូរថ្លៃដូចជា៖ ជិះទូក, ជិះកប៉ាល់, ជិះឡានក្រុង ឬក៏ ការជិះកង់ជាដើម។

ឧទាហរណ៍៖​ បើសិនជាអ្នកនៅប្រទេសកម្ពុជាហើយដំណើរកម្សាន្តរបស់អ្នកទៅកាន់ប្រទេសថៃ នោះអ្នកនឹងមានជំរើសក្នុងការធ្វើដំណើរដូចជា៖ ជិះយាន្តហោះ ឬ ជិះឡានក្រុង ដូច្នេះបើសិនជាអ្នកធ្វើដំណើរតាមឡានក្រុងនោះការចំណាយនឹងតិចជាងជិះយាន្តហោះ ហើយអ្នកប្រាកដជាបានចូលលេងកន្លែងជាច្រើន ឬ បានមើលទេសភាពតាមផ្លូវ ឬក៏​ ថតរូបជាដើម។